أسامح جنت أسامح ورضه وياك
وأصالح بالزعل من دون تأخير
وأذكرك لونسيت بذيج وبذيج
أذا أنته صدك محتاج تذكير
وأعرف الماتصير أوياك فدنوب
أسويهه وأكولن بلكت أتصير
شربت الحبر الأبيض أمسح _أغلاط
ألك كلك شفت يراد تحبير
وكفني العطش يم بابك أيام
لكيت بجنتك مامش قوارير
ماشيتك عمر عالزين والشين
وأنشدك هم شفت من عندي تقصير
أوديلك ورد خالي من الأشواك
أجيك ألكه الورد صايرشواجير
ساومت أعله روحك حيل وياك وبعت زهرة شبابك بالدنانير
جاي اليوم تجبر خاطري أبيش
الكسرته مابعد يرهمله تجبير
كافي من السوالف ونسه الأعذار
ماألهن بعد بالروح تأثير
أنه أجروحي غفت وأدمومهه أتسيل
أمدامن عالوجع ميفيد تخدير
الكلب من يوم غدرك بابه مسدود
موبس بقفل دك بمسامير
جنت عصفور أغرد لليغردون
هسه أسمع فقط لحن العصافير....
الإثنين سبتمبر 27 2010, 08:25
