موكلها اصدقاء التمشي وياك
ثق حتى باخواتك تلكه عدوان....
يصح مرات بيك لسانك يكون
وعلي يمكن تخسرك زلة لسان...
لاتامن درب ماساحكة جدام
على دروب الامانة تشوف نيشان....
وليغرك حسن حلوة الفراشات
ولك بس تكظها تبيع الالوان.....
ولتغرك جبال مناطحة الغيم
لاخير بجبل يطغي على وديان....
يعجبني البخور يعيش بالموت
يثبت طيبته شما يطي دخان.....
ويعجبني الجرف لو زاعله الماي
يتفطر صبر ماكله عطشان....
ترة خطيه الجكارة تظحي بالروح
وعكب ماتحترك نشمرهة طغيان....
الذيابة اهل الغدر سموهم الناس
وعليهم بالغدر ماعندى برهان....
منو البنيه الضحية الماكله الذيب
احنه انسان صاير ياكل انسان.....
ذكية النار عاشت رافعه الراس
تحرك ماتجامل كان ما كان.....
واهي الشي الوحيد الماخسر يوم
لان مافضلت تمشي ويه صحبان....
ليش الغيم يفتر ماله مجان
وخلص رحال عمرة وماله مجــــــان....
لان يدري الحمم تبدي من الاطراف
ولهذا السبب ماراد جـــــــيران......
تمسكت شكثر بصحاب الي هواي
بكثر تضحيتي الهم هسه ندمان.....
لهات انه وتبينو صحبتي الموس
اثاري انه خسرت والموس ربحان....
غير الموت كلي شيعزف السيف؟؟
وجعلت الاله نحري ورايد الحان.....
شتعزف وشتسمع من لحني ياصاحبي شبيك
تخيل سيف يعزفله على شريان...
بعد ماصير حنة واثبت بالجفوف
لان من سوء حظي الحطني فرحان......
راح من الصخر انحتلي دلال
واجفن كلبي واتعنه على دفان....
واكله اتبدلت كل المــــوازين
السفينة يصير تمشي بدون قبطان.......
واكله تبدلت كل المـــــوازين
الدليل الناي يحجي وما الة لسان.....
واكله تبدلت كل المــــوازين
مريم ماطلع والدها عمــــران.....
واكله العنده غيره الافضل يموت
لان كلش جريمة تغلبه غمـــــان.....
الإثنين سبتمبر 27 2010, 09:02
