وين صفينا يا عراق

------- وين صفينا يا عراق -------

صفينه ايدنه وي الكاع حتى الكاع ملت من خطاوينه
وصفينة ركام يا مهيوب اسمك ليش تريد تمسح كل اسامينه
وصفينه ايد تلوي الايد بعد ماحار الوكت شلون يلوينه
وصفينه الدم للركاب يسيل بكل بيت الجفن حضرناه اخاف الموت يلفينه
وصفينه من الغروب انام بعد ما جنت سهر كله ليالينه
وصفينه نكول للي يموت روح اخلص من قهرنا ومن بلاوينه
وصفينه بالتفك متحزمين بس نكتل بعض والموت حادينه
وصارت كل مدنا كبور ظلمه ونلبس بس سواد شوكت ما جيت تلكينه
وصفينه عالهويه نذبح الجيران ولا جن سنين الحلوه وياه كضينه
وطولنا اللحايا وكصرنا الثياب وصار باسم الدين تطلع
كل فتاوينه
وصفينه نخبط الصافي بنهرنا الماصفه فد يوم طينه
وضفينه نعيد بالتاريخ ولعصر الجاهليه اليوم ردينه
ولا جنه اول حضارة صارت اعل الكاع ولا جن اول مسله احنه سنينه
ولاجن حكمنا الدنيا من بغداد ولاجن المنايا تخاف لو سمعت بطارينه
ولا جن كبل واحدنه من ينضام يفز الكلب من حشاه ويعينه
شجانه اليوم بس كاتل ومكتول ولا رحمه بكلبنا كلي اشبينه
نبوك من الليالي مسامر الخلان ونكطع وصل حبهم من شرايينه
نحرم كل ترافه تخطر اعل البال وندندن صرنا بالسكوت اغانينه
وصفينه كلشي ما حاوين لاحاضر جديد ولا ماضي قديم اللي يواسينه
نهاجر نكول بلكي يهده البال بره وتتحقق امانينه
ومن نفرح غفل نبجي بدمع مهضوم لان فرحتنا تغص بكل مآسينه
جاوبني يالعراق وكلي ليش هيجي صفينه
---------------------

[ندعوك للتسجيل في المنتدى أو التعريف بنفسك لمعاينة هذه الصورة]

[color=red]الله عليك يالملاك كلك ابداع قصيدة روعة من عضو اروع.. تقبل مروري يالغالي[/color]

» شوكت ترجع يا عراق
» الشاعر العراقي الشهيد رحيم المالكي(يا عراق)