شاعر المهجر ادلى بقصيدته
هاجرنه غصب ماجان عالبال..نجفي بيوت اهلنه وذيج الرسوم
مشينه بلا وعينه بطركَ الخيال..وتركنه ارواحنه اعله بيوتنه تحوم
عفنه الامّهات مهدّله هدال..وعله خدود الخوات تسيل الدموم
تفرهدنه عمرنه وراحة البال..وتجرعنه صبر واهات وسموم
مامعقوله تنكر دم جره وسال..القلم ذمّه وحذرك بالحجي تسوم
اذا يوسف وكَع وزنودك طوال..مد جفّك ابّيره وصيح بيه كَوم
بجمر ماتنجوي ومتعلمه الدلال..يجويه اليذم كَهوتهه ويلوم
دسنه اجّم خشم مرفوع بالعال..بس اسال ضميرك تاخذ علوم
هيبه شلون ماتحسبهه الجبال..تفيّ الهامهن وتبوس الغيوم
مادكَينه هام بمحضر انذال..ولاعاشرنه واطي وعرضه مثلوم
حسين الصاح بينه تلاحكَو الحال..وكَمنه بلا وعي اعله صياح كلثوم
يخوي الغربه ذلّه وهمهه جتّال..ومن لوعاتهه الدلال ملجوم
سوالف عندي زحمه وعيب تنكَال..وللحر بالاشاره نوصل العلوم
العمر شرجي خلص ماهب اله شمال..وسفينه بغير دانكَ تايهه تعوم
ورفس روحي الوكت رفسات مهوال..وراواني بظهر تموز النجوم
سرج روحي ولكدني لكاد خيّال..وروحي مسودنه بمركاض الهموم
حايط روحي ابد مالاحه محجال..بس الفركَه تهدم ساف كل يوم
خلّك من كلام الكَيل والكَال..جرحي وجرحك شما كَدّرت توم
الأحد أكتوبر 24 2010, 08:02